ICILS (the International Computer and Information Literacy Study) 2023 beynəlxalq qiymətləndirmə tədqiqatının əsas sorğu mərhələsi ilə əlaqədar olaraq cari ilin 20 - 24 mart tarixlərində Portuqaliya Respublikasının paytaxtı Lissabon şəhərində Milli Tədqiqat Koordinatorlarının Qiymətləndirmə Təlimi toplantısı keçirilib.
Toplantının məqsədi ICILS-2023 beynəlxalq qiymətləndirmə tədqiqatında məlumatların (dataların) toplanması və idarə olunması, tərcümə və verifikasiyası üzrə fəaliyyətləri müzakirə etmək, şagird nəticələrinin qiymətləndirilməsi təliminin keçirilməsidir.
Görüşdə Azərbaycan Dövlət Pedaqoji Universitetinin (ADPU) strateji inkişaf məsələləri üzrə prorektoru Könül Pirverdiyeva iştirak edib.
IEA Beynəlxalq Kompüter və İnformasiya Savadlılığı Tədqiqatı (ICILS 2023) Əsas Sorğu Qiymətləndirmə Təlimi toplantısında IEA-nın baş layihə məsləhətçisi və ICILS tədqiqatı icraçı direktoru Julian Freire, İEA-nın Beynəlxalq kompüter və informasiya savadlılığı tədqiqatı üzrə beynəlxalq data meneceri Tim Daniel, elementlərin inkişafı üzrə mütəxəssis Daniel Duckworth çıxış edərək ICILS tədqiqatı üzrə şagird nəticələrinin qiymətləndirilməsi və kodlaşdırma prosesi haqqında məlumat veriblər.
Beynəlxalq Kompüter və İnformasiya Savadlılığı Tədqiqatı (ICILS) VIII sinif şagirdlərinin kompüter və informasiya savadlılığı (CIL) bacarıqlarının kompüter əsaslı beynəlxalq qiymətləndirilməsidir.
ICILS ilk dəfə beynəlxalq səviyyədə İEA - Təhsil Nailiyyətlərinin Qiymətləndirilməsi üzrə Beynəlxalq Assosiasiya tərəfindən 2013-cü ildə, ikinci dəfə isə 2018-ci ildə tətbiq edilib.
Sorğu 2013-cü ildə 21 təhsil sistemindən 3300-dən çox məktəbdə 60000 VIII sinif şagirdinin (orta yaş 13,5 yaş) kompüter və informasiya savadlılığı (CIL) bacarıqlarını qiymətləndirib. 2018-ci ildə isə tədqiqatda 12 ölkədən və iki müqayisəli təhsil sistemindən 46000-dən çox şagird iştirak edib.
Hər beş ildən bir keçirilən ICILS-in növbəti administrasiyası 2023-cü ildə olacaq və 30 ölkə bu tədqiqatda iştirak edəcək. Azərbaycan 2023-cü il administrasiyasında ilk dəfə iştirak edəcək. Ölkəmizdən 164 təhsil müəssisəsinin VIII sinif şagirdləri bu tədqiqatda iştirak edəcəklər ki, bu da şagirdlərin araşdırmaq, yaratmaq, ünsiyyət qurmaq üçün texnologiyadan istifadə bacarıqlarını, təcrübələrini və şagird performansı, texnologiyaya çıxış, beynəlxalq həmyaşıdları ilə istifadəsinin müqayisəli datalarını təmin edir.
ICILS vasitəsilə toplanan məlumatlar “rəqəmsal uçurumun” mahiyyətini və miqyasını anlamaq üçün dəyərli məlumat təmin edəcək və texnoloji bacarıqlar, təcrübə, digər əsas mövzu sahələrində şagird performansı arasındakı əlaqəni başa düşmək üçün məlumat vermək potensialına malikdir.
ICILS ölkələrarası VIII siniflərdə kompüter və informasiya savadlılığı bilik və bacarıqları qiymətləndirir, şagirdlərin informasiya əsrində həyata nə dərəcədə yaxşı hazır olduğunu, kompüter və informasiya savadlılığı, onun haqqında bir neçə əsas konteksti araşdırır. Araşdırma üçün ICILS şagirdlər, müəllimlər, məktəblər və rəsmi təhsil siyasətləri haqqında da məlumat toplayır.
Bu barədə ADPU-dan məlumat verilib.