Almaniyanın səfiri Ralf Horlemann "Səfir saatı" layihəsində iştirak edib

Almaniya Federativ Respublikasının Azərbaycandakı səfiri  Ralf Horlemann Azərbaycan Dillər Universitetinin (ADU) qonağı olub.

 

ADU-nun rektoru akademik Kamal Abdulla tələbələrin alman dilinə olan marağından danışıb, bildirib ki, tələbələr alman dilini, Almaniyanın tarixi və mədəniyyətini böyük həvəslə öyrənirlər.

 

Qeyd olunub ki, alman tarixi, mədəniyyəti, təhsili və elmi hər zaman diqqət mərkəzində olub və bu gün də tələbələrin diqqətini özünə çəkir. Məhz bu baxımdan ADU-da alman dilinə və mədəniyyətinə maraq yüksəkdir:

 

“Mənə elə gəlir ki, bütün Azərbaycanda olduğu kimi, universitetimizin müəllimləri və tələbələrində də Almaniyaya böyük bir məhəbbət var. Universitetimizə Almaniyadan olan səfirlərin gəlişi ilk dəfə deyil, bundan öncə də olub və düşünürəm ki, bu səfərlər əlaqələrimizin inkişafına öz müsbət təsirini göstərib.

 

Universitetimizdə alman dilini öyrənən tələbələr tədbirlərdə aktiv şəkildə iştirak edirlər. Bu yaxınlarda alman dilini öyrənən tələbələrimiz Ulu Öndər Heydər Əliyevin təhsillə, mədəniyyətlə, ümumən dünya ölkələri ilə bağlı dediyi fikirləri alman dilinə tərcümə ediblər və bu tərcümə kitab şəklində çap olunub. İnanıram ki, bundan sonra da əlaqələrimiz yüksələn xətlə inkişaf edəcək və əməkdaşlığımız daha da möhkəmlənəcək”.

 

Səfir Ralf Horlemann səmimi qarşılanmaya və xoş sözlərə görə ADU rəhbərliyinə və kollektivinə öz minnətdarlığını bildirib.  Qeyd edib ki, alman dilini öyrənmək və işlətmək istəyən tələbələr və mütəxəssislər üçün hər zaman şərait yaradılır və bu istiqamətdə mühüm işlər görülməkdədir.

 

Görüşdə alman dilinin təbliği, mübadilə proqramları, birgə tədbirlərin təşkili ilə bağlı fikir mübadiləsi aparılıb.

 

Daha sonra Ralf Horlemann "Səfir saatı" layihəsi çərçivəsində tələbələrlə görüşüb. 

 

 



25.05.2023 | 12:14