Rektor Fransa universitetlərinin professorları ilə görüşüb

Bakı Mühəndislik Universitetinin (BMU) rektoru, professor Havar Məmmədov Fransanın Paris-Saclay Universitetinin PhD ilə bağlı beynəlxalq əlaqələr koordinatoru, professor Rachid Bennacer və  Lorraine Universitetinin professoru Mohammed El Ganaoui ilə görüşüb.

 

Hər iki qonaq BMU və Kanadanın Ryerson Universitetinin birgə təşkilatçılığı ilə keçiriləcək “13-cü Beynəlxalq Termal Mühəndislik konfransı: nəzəriyyə və tətbiq”  beynəlxalq konfransında iştirak etmək üçün ölkəmizdə səfərdədir.

 

Rektor H.Məmmədov BMU, burada tədris olunan ixtisaslar, həyata keçirilən beynəlxalq proqramlar barədə ətraflı məlumat verib. Ölkəmizdə ilk dəfə baş tutacaq konfransın önəmindən danışan rektor Azərbaycanın Prezident İlham Əliyevin rəhbərliyi ilə güclü inkişaf yolu keçdiyini vurğulayıb. Azərbaycanın innovativ mühəndisliyin tətbiqi sahəsində də uğurlar qazandığını deyən H. Məmmədov beynəlxalq konfransda aparılacaq elmi müzakirələrin, irəli sürüləcək təkliflərin əhəmiyyətli olduğunu deyib.

 

Görüşdə konfrans barədə geniş məlumat verilib və beynəlxalq tədbirdə Kanada, ABŞ, Fransa, Rusiya, İspaniya, İtaliya, Avstraliya, İsrail, eləcə də digər Asiya və Avropa ölkələrindən 100-ə yaxın mütəxəssisin iştirakının gözlənildiyi bildirilib. Bununla yanaşı, Fransanın Lorraine Univeritetinin keçirdiyi “Materiallar və enerji  konfransı”nın (http://www.icome.ecam-epmi.fr/) təşkilat komitəsinin BMU-da təşkil ediləcək konfransa (İCTEA)  qatılmağa qərar verdiyi xüsusi vurğulanıb.

 

Daha sonra görüşdə BMU ilə hər iki universitet arasında gələcək əməkdaşlıq imkanları geniş müzakirə olunub.

 



21.05.2022 | 13:41