Bakı Dövlət Universitetinin (BDU) rektoru Elçin Babayev EBSCO nəşriyyatının MDB ölkələri üzrə direktoru Andrey Sokolovla görüşüb.
Rektor Elçin Babayev qonağa BDU-nun Elmi Kitabxanasının modernləşdirilməsi istiqamətində son illər görülən işlər, bu sahə üzrə kadr hazırlığı barədə məlumat verib. Qeyd edib ki, BDU alimləri “Web of science” bazasında məqalə nəşrinə görə Azərbaycan universitetləri arasında ilk yerdədir. BDU-nun Hirş indeksi artıq 55-dir. Rektor qeyd edib ki, bu sahədə müasir dövrün tələblərinə cavab verən kadr hazırlığını həyata keçirmək üçün BDU-nun kitabxanaçılıq-informasiya fakültəsinin adı dəyişdirilərək informasiya və sənəd menecmenti fakültəsi adlandırılıb.
EBSCO nəşriyyatının MDB ölkələri üzrə direktoru Andrey Sokolov da BDU ilə əməkdaşlıqdan məmnun olduğunu bildirib. Qeyd edib ki, EBSCOHost şirkəti aparıcı nəşriyyatların elmi resurslarının ən böyük əlaqələndiricisidir. BDU Elmi Kitabxanası oxucularına elm və tədris sahələrinə aid müxtəlif məlumat bazalarından istifadə etmək üçün EBSCO şirkəti ilə abunə yazılışını həyata keçirir. Elmi Kitabxana 20 ildir ki, Azərbaycan Kitabxana İnformasiya Konsorsiumu çərçivəsində müqavilələr əsasında EBSCOHost şirkəti ilə əməkdaşlıq edir və üzv təşkilatlara lazım olan elm və tədris sahələrinə aid onlayn ədəbiyyatı sifariş edir.
Görüşdə BDU ilə EBSCO arasında əməkdaşlığın perspektivləri müzakirə olunub.